مجلس کے رکن پارلیمنٹ بیرسٹر اسدالدین اویسی نے دہلی کی سڑکوں پر گزشتہ کئی دنوں سے جاری کسانوں کے احتجاج پر نریندر مودی حکومت کو شدید تنقید کا نشانہ بنایا۔لوک سبھا میں صدر جمہوریہ کے خطاب پر ہوئے تحریک اظہار تشکر کے مباحث میں حصہ لیتے ہوئے بیرسٹر اویسی نے کہا کہ ملک میں احتجاج ہوتا رہے گا اور حکومت اگر شہریت ترمیمی قانون (سی اے اے) کے قواعد وضع کرے گی تو اس کے خلاف عوام ایک بار پھر سڑکوں پر آئیں گے۔
بیرسٹر اویسی نے کہا کہ وزیر اعظم نریندر مودی نے آندولن جیوی اور پرجیوی جیسے الفاظ استعمال کیے لیکن اس میں برائی کیا ہے اور یہ تحریکیں جاری رہیں گی۔ مجلس کے رکن پارلیمنٹ نے کہا ، ‘میں ایک آندولن جیوی ہوں۔ کھل کر بول رہا ہوں حکومت سے کہ اگر سی اے اے کا قانون بناۓ گی تو ہم دوبارہ سڑکوں پر نکلیں گے۔اور وہ کسی سے ڈرنے والے نہیں ہیں انھوں نے کہا کہ “نریندر مودی ،دہلی سلطنت کے بادشاہ یا جہاں پناہ نہیں ہیں اور ظل الٰہی کا دور ختم ہوچکا ہے مودی کی آنکھوں میں آنکھیں ڈال کر ان کی غلطیوں کو بولا جائے گا “
